مكتوبه علي اسمي 55

اتواصلوا معاه واتفقوا انهم يقابلوه عشان ياخدوه المكان إللي فيه والدته وعملوا كل احتياطتهم عشان يطمنوا ان مفيش حد مراقبه دخل المخزن وهو مستسلم لهم وكانوا حاطين شريط اسود على عينيه عشان ميعرفش المكان. 
رفعوا الشريط الاسود اللي على عين عامر واول لما فتح عينيه شاف الطوخي قدامه وقال إيه المكان الغريب ده!! اومال عزيز فين
رد الطوخي عزيز باشا مش عايز يقابل حد وانا اللي هخلص معاك كل حاجة وعزيز باشا هياخد الفلوس ويسافر هو.
عامر بثقة الفلوس جاهزة بس اطمن علي امي وميرنا الأول.
الطوخي وماله يا باشا حقك.. بس احنا كمان لازم نعد فلوسنا.
عامر بسخريه هو انت بتتكلم بجد!! يعني انتوا هنا مش بتهزرو .. انا قولت ان عزيز قاعد فاضي وقال يسلي وقته عشان كده حد تبعه كلمني وقالي انه خاطف مراته وبنته!! وبالعقل كده مفيش واحد بيخطف مراته وبنته وانا عجبتني اللعبة وقولت اكمل معاه فيها واللي معايا في الشنطة دي ورق ابيض مش فلوس.
الطوخي پصدمة يعني ايه يا باشا انت هتلاعبنا ولا ايه!
عامر بثقة انتوا اللي بتلعبوا مش أنا!! في حد بيخطف مراته وبنته ويطلب 20 مليون!!
الطوخي لا يا باشا اللي حصل ده حقيقي ومش لعب ووالدتك والبنت اللي معاها تحت ايدينا ولو مدفعتش هنخلص عليهم.
عامر أصدق الكلام ده إزاي أنا دلوقتي!! يعني بالعقل كده هو في واحد بيخطف مراته وبنته!! انا مش فاهم عزيز كان بيفكر في إيه وهو بياخد مراته وبنته وبيقولي انه خطفهم!! المفروض ان انا ادفعله الفلوس واخدهم من هنا وارجعهم بيته تاني!! ما انا اكيد مش هحرمه من بنته ومراته!
الطوخي بص ل عامر پصدمة وعامر قال انا عارف ان امي وميرنا هنا في امان ومش مخطوفين ولا حاجة وده اللي مطمني.
الطوخي بعصبيه لا يا باشا متطمنش اوي لان الست والدتك والبنت اللي معاها مخطوفين فعلا.. احنا اللي خطفناهم واقولك على اللي اكبر من كده عشان تعرف اننا مبنهزرش.. احنا اللي المهندس ابن خالتك.. بعتله رجالتي في المكان اللي كان راكن عربيته فيه وضړبوه وكانوا هيخلصوا عليه وكل ده حصل بالاتفاق مع عزيز.. هو إللي كلمه وقاله يقف يستناه في المكان ده وقالي ابعت الرجاله يخلصوا وانت شوفت بنفسك اللي حصله وكان ممكن ېموت فيها بس اتكتبله عمر جديد.. ها لسه مش مصدق اننا مش بنهزر!
عامر لا.. لا.. متقولش كده!! انا عارف انك بتقول كده عشان اصدق انها مش لعبه بس انا عارف ان عزيز ميعملش كده ابدا وانت كمان شكلك راجل محترم ميطلعش منك شغل ده!
الطوخي پغضب وجنون طب عليا الطلاق انا وعزيز اللي اتفقنا على المهندس ابن خالتك وكنا عليه.. واقولك على اللي اكبر من كده.. انا وعزيز كنا متفقين نخطف والدتك بس انا طلعت اذكى من عزيز بنته ومراته ولو الفلوس اللي طلبتها مجتش دلوقتي هخلص عليهم كلهم عشان تصدق اننا مش بنهزر.
عامر ابتسم وهو بيقرب منه وقال كده انا صدقت.. وكلنا صدقنا.
وفاجئ الطوخي بلكمة قويه في وشه وبحركة سريعة أخد اللي كان في ايديه وحطه في دماغ الطوخي وهدد كل الرجاله اللي واقفين ان محدش يقرب... بقلمي ملك إبراهيم.
... يتبع
روايات ملك إبراهيم